Хатырыкская сельская модельная библиотека им. М.А.Охлопковой

Ити инники кэпсээбиппит курдук, Хатырык библиотекатын үлэтэ-хамнаһа бэчээккэ тахсан  киэҥник тарҕаммыта, араас улуустартан библиотека үлэһиттэрэ кэлэн опыт атастаһар буолбуттара.

Ол курдук,  Хатырык библиотеката бэйэтин учаастагын ааҕааччыларын кытта үлэнэн муҥурдаммат, маны сэргэ Көбөкөн, Түбэ, Модут сельскай библиотекаларын кытта куруутун сибээстэһэр, үлэлэригэр көмөлөһөр. 60- с сылларга Мария Алексеевна республика библиотекаларын кытта сибээһэ лаппа кэҥээбитэ. Оччолорго суол-иис да суоҕа. Кыайан кэлбэт библиотекардар суругунан сибээстэһэллэрэ. Почта сибээһэ киэҥ сиринэн тайыыр буолан харгыс-мэһэй суоҕа. Суругунан сибээһи Сунтаар оройуоннай, Маар Күөл, Кутана, Бордоҥ сельскэй библиотекалара. Орто Халыматтан, Налимнааҕы, Үөһээ Бүлүүттэн Намнааҕы, Амматтан Абаҕатааҕы, Абыйтан Майордааҕы уо. д. а библиотекалар тутуһаллара. Библиотекардар Мария Алексеевнаттан библиотека үлэтин араас боппуруостарыгар ыйытан көмө көрдөөн суруйаллара.  Библиотекаларга, кулууптарга көмө материаллары: М. Аммосов, П.Ойуунускай хаартыскаларын,  табыллан ыытыллыбыт биэчэрдэр сценарийдарын, диспуттар хаамыыларын, көрдөрөн агитация холобурдарын илиинэн уруһуйдаан почтананан ыытара. Кини аҥардас бэйэтэ эрэ ыытар буолбатаҕа. Хаһыакка тахсыбыт сэдэх матырыйааллары көрдөөн Сойуус араас дойдуларыттан, саха сирин араас муннуктарыттан кытта ылларара.

Мария Алексеевнаны А.С.Пушкин аатынан республиканскай библиотека штаты таһынан методист быһыытынан үлэлэтэрэ. Кинини республика оройуоннарыгар командировкаҕа ыытан, практическай көмө оҥоттороллоро, үлэтин опытын атастаһара. Практическай көмө оҥорон, тиийбит улуустарыгар библиотечнай плакаттары, диспуттары, ааҕааччылары кытта көрсүһүүлэри тэрийэн ыытара, ыччаты кытта аахпыт кинигэлэрин дьүүллэһэн араас диспуттары, мөккүһүүлэри тэрийэн ыытара. 1964 с. кини Орто Халыма уонна Абый оройуоннарыгар сылдьыталаабыта. Ити курдук Мария Алексеевна Хатырык библиотекатын үлэтин опытын атыттары кытта үллэстэн, республика библиотекаларын үлэлэрин тупсарарга ативнай кыттыыны ылбыта.

Антонова Ульяна Николаевна, М.А.Охлопкова аатынан Хатырык модельнай библиотекатын сэбиэдиссэйэ, СӨ култууратын туйгуна