Хатырыкская сельская модельная библиотека им. М.А.Охлопковой

Саха сиринээҕи А.С.Пушкин аатынан республиканскай библиотека методическай отдела  1966 сыллаахха “Библиотека уонна ааҕааччы” брошюраны  бэчээттээн таһаарбыта. Брошюра автора Анна Прокопьевна Алексеева. Манна Нам оройуонун Хатырык сэльскэй библиотекатын үлэтин опыта кэпсэнэр.

Мария Алексеевна бу библиотекаҕа 1955 сылтан үлэлээбит. 1966 сыллаахха номнуо САССР култууратын үтүөлээх үлэһитэ ааты ылбыт, библиотекатын Саха сирин таһымыгар эрэ буолбакка Россия таһымыгар кытта таһаарбыт эбит.

Хатырык сельскэй библиотеката үчүгэй үлэтин иһин РСФСР культуратын министерствотын маҥнайгы степеннээх дипломунан наҕараадаламмыта. Сэбиэдиссэй М. А. Охлопкова хас да төгүллээн ССРС, РСФСР, САССР культуратын Министерстволарын Бочуотунай Грамоталарынан наҕараадаламмыта, – диэн суруллубут.

Библиотекаҕа ааҕааччыны кытта утумнаах үлэ барарын туһунан сиһилии суруллубут. Ол курдук оскуола үөрэнээччилэрэ төрөппүттэригэр, ыалларыгар библиотекаттан кинигэ, хаһыат тутуурдаах сылдьан ааҕан биэрэллэрэ олохтоммут. Ааҕааччылар ахсааннара сылтан сыл эбиллэн иһэр эбит. Библиотекарь саҥа тахсыбыт кинигэлэри киэҥник пропагандалыыр буолан, колхоз үлэһиттэрэ бастыҥ уопут туһунан тахсыбыт кинигэлэри үлэлэригэр элбэхтик туһаналларын туһунан кэпсэнэр. Маассабай-политическай үлэ тэтимнээхтик ыытыллар. Кинигэни ырытыы, ааҕааччылар конференциялара ыччаты кытта үлэ биир сүрүн көрүҥэ. Маны таһынан араас куруһуоктар быыстала суох ыытыллаллар. Мария Алексеевна ыччат ортотугар киэҥ аптарытыатынан туһанар. Кыраайы үөрэтии библиотека уонна ааҕааччы оччоттон баччаҕа дылы биир сүрүн хайысхата буолар. Ол да иһин биһиги нэһилиэкпит историятын библиотекаттан булуохха сөп эбит. Биһиэхэ элбэх фотоальбомнар, ахтыылар харалла сыталлар. Бу буолар биһиги баай нэһилиэстибэбит.