Хатырыкская сельская модельная библиотека им. М.А.Охлопковой

«Биһиги Маайабыт туохтан да толлубат , иҥнибэт барыны бары сатыыр» диэн нэһилиэгин дьоно мээнэҕэ бэлиэтээбэтэҕэ.

Кырдьык,  кини маһынан, фанеранан олус үчүгэйдик уһанара, араас арааамалары, планшеттары, полкалары оҥороро уо.д.а Кимтэн да көрдөһө барбакка бэйэтэ оҥороро, кини оҥорбута олус үйэлээх бөҕө буолара. Кэлин уларытаары бэрт эрэйинэн көтүрэрбит. Табаар дьааһыга, хордуоҥка, лиис тобоҕо сытарын мээнэ ааспат, библиотекаҕа туһаҕа таһаарара. Кинигэ полкатын тутулуга чаастатык алдьанар идэлээх, ону тута маһынан кыһа охсон угара, ону оҥорор хатыҥ мас тоһоҕолорун хаһаанара.

Мария Алексеевна  маһынан, фанеранан оҥоһуу, кыраасканан суруйуу үлэтин чахчы баһылаабыт. Табаар дьааһыгын фанерата, хордуоҥка, тимир лиис лоскуйа, эбэтэр кыһыл таҥас, кумааҕы, онтон да атын Мария Алексеевна илиитигэр киирдэҕинэ күүрээннээх үлэҕэ ыҥырар плакаттарга, лозуннара кубулуйар.

 Түннүк өстүөкүлэтин биири да алдьаппакка мындырдык быһара. Элбэх саҥа дьиэлээхтэри абыраабыт буолуохтаах. Ыҥырыыга сылдьар быһааччы этэ. Карл Семенович, Альбина Семеновна Куличкинар күн бүгүнүгэр дылы саҥа дьиэлэрин түннүгүн барытын сарсыардаттан киэһээҥҥэ дылы кэлэн быһан биэрбитин умнубаттар, махталынан ахталлар.