Хатырыкская сельская модельная библиотека им. М.А.Охлопковой

Мария Алексеевна Охлопкова тэрийбит М.К. Аммосов аатынан СР судаарыстыбаннаһын историятын музейыгар бэйэтэ суруйан, сыһыаран оҥорбут фотоальбома кичэллээхтик харалла сытар.

Бу альбом 1963 с. тэриллибит үтүөкэн суолталаах тэрээһин, хорсун быһыы туоһута буолар. Оччолорго Ойуунускайдаах Омуоһап ааттара наһаа дор5оонноохтук ааттаммат этэ. Репрессия ыар тыына саха сирин үрдүнэн өр кэмнэргэ бүрүүкээн турбута.

          Максим Аммосов доҕоро Платон Алексеевич Ойуунускай 1955 с. реабилитацияланан, үтүө аата норуотугар төннүбүтэ.

          Мария Алексеевна П.А. Ойуунускай төрөөбүтэ 70 сылыгар аналлаах биэчэри Хатырыкка аан бастакынан тэрийбитэ. Платон Алексеевич туһунан хаартыска уонна кинигэ быыстапкатын оҥорбута.

          Куораттан кэлбит күндү ыалдьыттар Ойуунускай кэргэнэ, тапталлаах Өкүүчэтэ –А.Н. Борисова-Ойунская, Г. Г. Окороков, А. А. Бэрияк дакылаат аахпыттара, тыл эппиттэрэ. М.К.Аммосов аатынан колхоз, оскуола салайааччылара, дьон-сэргэ бары кыттыыны ылбыта, өрө көтөҕүллүү, үөрүү, киэн туттуу тыына үөскээбитэ.

Надежда Ивановна Лукинова, СР судаарыстыбаннаһын историятын музейын үлэһитэ,

СӨ култууратын туйгуна