Хатырыкская сельская модельная библиотека им. М.А.Охлопковой

1931 сыллаахха комсомолларга Максим Аммосов ыыппыт 20  кинигэтинэн ыччат дьон мустар сиригэр ааҕар  балаҕан тэриллибит. Бастакы ааҕар балаҕан үлэһитэ суох быһыылаах. Ол туһунан ханна да сурук хаалбатах. Бу 20 кинигэ кэлбитин туһунан ахтыы оччотооҕу комсомолец Роман Кутуков ахтыытыгар баар. Комсомоллар ким баарынан уларса сылдьан аахпыт буолуохтарын сөп. Онтон 1940 сыллаахха  252 кинигэ фондалаах ааҕар балаҕан туһунан дьэ аһыллар.

Сурукка хаалбытынан 1943-44 сылларга Аграфена Тимофеевна Тимофеева үлэлээбит. Эдэркээн кыыс сэрии кэмэ буолан туох баар үлэҕэ барытыгар сылдьара. 20 кинигэ эбиллэн син 100-тэн тахса кинигэлээх этэ. Кинигэлэрин биирдии комсомол чилиэннэригэр туттаран фермаҕа, биригээдэҕэ ыыталыыр. Ол сылдьан сводка хомуйан отчуоттуур. Уонна сайылыктарынан бытанан олорор дьоҥҥо-сэргэҕэ саамай күүтүүлээх киһинэн буолбута саарбаҕа суох. Кыһыннары-сайыннары алдьархайдаах сэрии ханна тиийбитин кэпсээччи, тугу кыайалларынан, сатыылларынан фроҥҥа көмө ыыталларын киирэн оройуоҥҥа туттарааччы, онтун быыһыгар ыччаты үлэҕэ көҕүлээччи этэ.

Оччотооҕу ааҕар балаҕан үлэһитэ, билиҥҥи культура үлэтин эрэллээх байыастара этилэр. 1944 сыллаахха оройуон фестивалыгар Хатырыктан 7 буолан киирэн бастакы миэстэни ылбыттарын туһунан Аграфена Тимофеевна ахтыбыта баар.

Васильева Любовь Ивановна, М. А. Охлопкова  аатынан модельнай библиотека үлэһитэ,

СӨ култууратын үтүөлээх үлэһитэ. Атырдьах ыйын 14 күнэ, 2026 сыл