Хатырыкская сельская модельная библиотека им. М.А.Охлопковой

Күндү ааҕааччыларбыт, нэһилиэкпит олохтоохторо!

Хатырык нэһилиэгин Мария Алексеевна Охлопкова аатынан модельнай библиотека бүгүҥҥү күнтэн ыла библиотекабыт историятын кэпсиир сыаллаах 95 ТҮГЭН туһунан күн аайы таһааран саҕалыыбыт.

95 хонугунан сэтинньи 15 күнүгэр – Нам оройуонун уонна Хатырык нэһилиэгин Ытык киһитэ, Нам оройуонугар култуура үлэһиттэриттэн аан бастакынан САССР култууратын үтүөлээх үлэһитэ үрдүк аат иҥэриллибит, Саха Өрөспүүбүлүкэтин култууратын 3 сьеһигэр делегатынан талыллан кыттыыны ылбыт, библиотекарынан үлэлээбитэ баара суоҕа 10 да сылын туола илигинэ Российскай Федерация култууратын туйгуна ааты ылбыт, Нам оройуонун уонна Саха АССР култууратын БОЧУОТУН кинигэтигэр киирбит, таайа Максим Кирович Аммосов аатын үйэтитиигэ сүдү кылаатын киллэрбит, Саха Өрөспүүбүлүкэтин Судаарыстыбаннаһын историятын музейын Хатырыкка төрүттээбит, нэһилиэк Сэбиэтин 5 төгүллээх депутатынан талыллан үлэлээбит, төрөөбүт-үөскээбит Хатырыга сайдарыгар ахсаана суох элбэх үтүөнү оҥорбут Мария Алексеевна Охлопкова – төрөөбүтэ 95 сылын туолар.

Оруобуна 95 сыл анараа өттүгэр Хатырыкка бастакы ааҕар балаҕан арыллыбыта. Элбэх кинигэҕэ, ахтыыларга да ахтылларынан аан бастакы ааҕар балаҕан арыллыытыгар олук уурбут киһинэн Максим Кирович Аммосов буолар. Ол курдук 1931 сыллаахха «Кэһэр» колхуос комсомолларыгар анаан 20 кинигэни ыыппыта биллэр.

Бу мантан саҕаламмыта биһиги нэһилиэкпит библиотекатын историята.

Күн аайы биһигинниин бииргэ буолуҥ, сэргээҥ!!!

Л.И.Васильева, Хатырык нэһилиэгин библиотекатын үлэһитэ, атырдьах ыйын 13 күнэ, 2026 с.