Ийэтэ Наталья Кириковна

16.08.2026
73
нет

Новости, О библиотеке

Маайа аҕата Охлопков Алексей Петрович, Хабаал Охлопков улахан уола, хоту Хатырыкка 1889 с. төрөөбүт. Ийэтэ Охлопкова (Аммосова) Наталья Кириковна (Кировна) 1887 с. соҕуруу Хатырыкка төрөөбүт. Кини Максим Кирович Аммосов бииргэ төрөөбүт эдьиийэ. Аҕата Өлөксөй Маайа төрөөтөҕүн сыл өлбүтэ.
Наталья Кириковнаны сырдык, ыраас хааннаах, өрүү үөрэн мичилийэ сылдьар харахтаах эмээхсин этэ диэн ыаллара ахталлар.
Максим Кирович үтүө аата дойдутугар эргиллитин историята, кини аатын үйэтитиигэ бастакы хардыылар Наталья Кириковна кыыһыгар Маайаҕа 1956 с. соҕотох хаартыскатын кистээн уура сылдьыбытын ытаан-соҥоон туран ууммутуттан саҕаламмыттара.
Кини ыйыытынан-кэрдиитинэн музей тэлгэһэтигэр Аммосовтар кыстык балаҕаннара үүт-үкчү үтүктэн тутуллубута, Аччыгый Арыыга балаҕан турбут сиригэр железобетонтан мэҥэ таас туруоруллубута. Наталья Кириковна олоппоско олорон балаҕан тутуутугар сүбэлээбитин, Аччыгый Арыыга тиэллэн киирэн ыйбытын тустарынан Мария Алексеевна “Кэс суругар” ахтан суруйар.
Ийэтэ Мария Алексеевнаҕа тыыннаа5ын тухары дурда-хахха, бастакы сүбэһит буолбута саарбаҕа суох. Наталья Кириковна самныбат санаатын, тапталын күүһүнэн улаатыннарбыт кыра, ыарыһах оҕото Маайа таайын аатын үйэтиппитэ, төрөөбүт Хатырыга чэчирии сайдарын туһугар олоҕун бүттүүн анаабыта.
Эбэтин туһунан сиэнэ, Раиса Аркадьевна маннык кэпсиир: Эбэм мин 6-с кылааска үөрэнэ сырыттахпына орто дойдуттан барбыта. Ийэтэ суох хаалбыт тулаайах сиэннэрин, биһигини улаатыннартаабыта. Кини көрүүтүнэн-истиитинэн, такайыытынан бу олоххо олордоҕум. Элбэх саҥата суох эмээхсин этэ, ону-маны кэпсээн ыһа-тоҕо сылдьыбат мааны майгылааҕа. Таҥаспытын үксүн бэйэтэ тигэрэ. Кини тикпит сымнаҕас куобах истээх үтүлүгүн, кээнчэтин сылааһа санаатахпына билиҥҥэ дылы сылааһа кэлэргэ дылы. Саха ынахтаах этибит. Сарсыарда аайы эбэм күөрчэх ытыйар тыаһыттан уһуктарбын билиҥҥэ дылы күндүтүк саныыбын – диэн кэпсиир.
- Лукинова Надежда Ивановна, М. К. Аммосов аатынан СӨ судаарыстыбаннаһын историятын музейын үлэһитэ, СӨ култууратын туйгуна. Атырдьах ыйа, 2026 сыл