Хатырыкская сельская модельная библиотека им. М.А.Охлопковой

Быйыл биһиги Хатырыкпытыгар 5-с сылын, 6 төгүлүн Москватааҕы Национальнай чинчийэр университет “Экономика үрдүкү оскуолатын” гуманитарнай факультетын  аспираннара , студеннара уонна преподавателлэрэ биһиги төрүт тылбытын чинчийэ, үөрэтэ кэллилэр. Тоҕо 6-с төгүлүн диэтэххэ, кинилэр 2022 сыллаахха сайын уонна кыһын, иккитэ кэлэ сылдьыбыттар эбит. Кинилэри филологическай наука кандидаттара Козлов Алексей Андреевич уонна Дунцов Алексей Николаевич салайан илдьэ сылдьаллар. 5 сыл анараа өттүгэр кэлсибит студеннарбыт ити университеттарыгар аспирант буолбуттар.

Мин быйыл кинилэри кытта иккис сайыммын дьарыктанным. Уонна бэйэм төрөөбүт тылбынан киэн туттуум күн-түүн күүһүрэн иһэриттэн үөрэбин. Үксүн кинилэр туохтуур тыл араас түгэҥҥэ хайдах туттулларын, хайдах сөпкө саҥарылларын,үөрэтэллэр. Сороҕор бэйэм да буккуллан ылыахпар дылы мускуйан,эрийэн үөрэтэ сатыылларыттан үөрэбин, билбэтэхпин биллэхпинэ сонньуйан да ылабын.

Бу университет биһиги эрэ тылбытынан дьарыктанар буолбатах. Араас кыра омуктар тылларын барытын үөрэтэллэр эбит. Салайааччылара Алексей Андреевич: Элбэх омук тылын үөрэттим да, сахалар төрөөбүт тылгытынан холкутук кэпсэтэргититтэн, суруйаргытыттан, оҕолоргутугар үөрэтэргититтэн сөҕөбүн уонна астынабын,– диир. Мордвин  омуктар тыллара сүппүтэ ырааппытын , билигин оҕолор оскуолаҕа омук тылын курдук үөрэтэллэр диэн хараастар.

Мин кинилэртэн бу үөрэппит тылларгытын салгыы хайдах үөрэтэҕит?– диэбиппэр: Күһүн үөрэхпитигэр тиийдэхпитинэ  нэдиэлэ ахсын мустан тугу, туох тылы үөрэппиттэрин ырыталлар эбит. Өйдөөбөтөхтөрүн Хатырык оскуолатын саха тылын учууталыттан Екатерина Спартаковнаттан, манна үөрэтэр консультаннарыттан ыйытан чуолкайдыыллар эбит. Бу темаларынан араас учуонай сэбиэттэргэ кытталлар, научнай ыстатыйалары бэчээттэтэллэр эбит.

Экспедицияларын түмүктүүр күннэрин иннинэ олорбут спортзалларын сууйан-сотон, ас астаан консультаннарын (кинилэр биһигини учууталларбыт диэн ааттыыллар) чэйдэтэр үгэстээхтэр. Алексей Андреевич олус минньигэс сакалааттаах брауни астаан күндүлүүрүн сөбүлүүр. Быйыл да традиция кэһиллибэтэ. Үөрэнээччилэрбит саҥа үөрэппит Аркадий Алексеев  мелодиятыгар “Саха үҥкүүтэ” ырыатын ыллаан иһитиннэрдилэр. Биһиги эмиэ норуот ырыаларын ыллаан иһитиннэрдибит. Ирэ-хоро сахалыы, нууччалыы сэһэргэстибит. Сахалыы остуол оонньууларын үөрэтэн оонньоон, астынан-дуоһуйан эһиил эмиэ кэлээриҥ  диэн алгыы хааллыбыт.

Тапталлаах, хайҕаллаах сахам тыла барахсан өрүү сайда тур!