Хатырыкская сельская модельная библиотека им. М.А.Охлопковой

Сарсыарда эрдэ кэлбит уолаттар Россия Күнүн чэрчитинэн матрешкалары кырааскалаатыбыт. Любовь Ивановна нуучча икки остуоруйатын сахалыы ааҕан иһитиннэрдэ.

Бүгүн аҕыйах да буолларбыт Барыласка Хатырыкка 1931 сыллаахха  бастакы тутуллубут оскуоланы баран көрөн кэллибит. Таарыччы ойуурга, бааһына кытыыларыттан  сибэкки үргээн гербарий оҥорон хатара уурдубут. Оҕолор интэриэһиргээн иһиттилэр. Бэйэлэрэ да билэллэр эбит ити оскуолаҕа эбээлэрэ, ийэлэрэ үөрэммиттэрин. Надежда Ивановна бу оскуола тутуутугар хас биирдии Хатырык олохтооҕо биирдии бэрэбинэни оҕуһунан, атынан состорон аҕалан туппуттарын кэпсээтэ.

Биһиги былаһааккабытыгар, ыраах Абыйтан кэлбит Хатырык ытык мааны ыалын Сороповтар сиэннэрэ сылдьаллар. Иккиэн уолаттар. Барыласка баран иһэн кинилэр эһээлэрэ, Джугджур Соропов оҥорбут “ТАПТЫЫР СИРИМ ХАТЫРЫК” Ытык Бэлиэҕэ сылдьан хаартыскаҕа түһэн бэлиэтэннибит. Бу бэлиэни Хатырыкка кэлбит эрэ киһи барыта тумнубакка хаартыскаҕа түһэн ааһар таптыыр сирбит, киэн туттар бэлиэбит буолар.

Өссө икки кыһыл былааҕы булан буорга көмөн туруордубут. Киэһээҥҥэ дылы турдаҕына бүгүҥҥү айанньыттар көрөн ааһыахтара.