Хатырыкская сельская модельная библиотека им. М.А.Охлопковой

Идэни сөпкө талыы диэн хас биирдии киһиэхэ дэҥҥэ бэриллэр дьол. Мария Алексеевна сэрии кэмин оҕото, аччык, аас-туор олоҕу, үүрүүнү-үтүрүйүүнү этинэн-хаанынан билбит кыыс, хайаан да идэ ылар баҕата баһыйан, библиотекарь идэтин талбыт буолуохтаах. Оччолорго культпросвет оскуола оҕолору олордон үөрэтэр уопсайдааҕа уонна интернат диэн аһатар остолобуойдааҕа. Тыа сириттэн кэлбит үгүс ыччат ол да иһин элбэхтик ити оскуолаҕа үөрэммиттэрэ. Онтон Мария Алексеевна сүрэҕин баҕатынан үөрэнэ киирбит буолан, олус кыһаллан уонна ситиһиилээхтик, дьулуурдаахтык үөрэнэн бүтэрбитэ. Эйэҕэс-сайаҕас кыыс элбэх доҕоттордоммута. Үлэлиир кэмигэр доҕотторунаан сибээһин отой быспатаҕа, куруук сүбэ-ама биэрэ сылдьара, Дьүөгэтэ, коллегата Мария Даниловна кэпсииринэн почтаттан көтөх муҥунан сурук тутара, уонна ол суруктарыгар барытыгар хайаан да эппиэттиирэ – диир.

Манна үөрэнэр сылларыгар омук, нуучча, саха классик  суруйааччыларын айымньыларын элбэҕи ааҕар, ол курдук ордук Н. В. Гоголь, Л. Н. Толстой, А. П. Чехов, И. С. Тургенев, А. С. Пушкин, М. Ю. Лермонтов, А. М. Горькай уо. д. а . суруйааччылар айымньыларынан умсугуйан туран аахпыта.

Иккис кууруска сылдьан, ыалдьан балыыһаҕа уһуннук сытан эмтэммитэ. Доруобуйата чөлүгэр түһэ илик буолан, үөрэҕин салгыыр кыаҕа суох, онуоха директора Иван Иннокентьевич Михалев сүбэтин ылынан, кэтэхтэн үөрэнэргэ көһөн дойдулаабыта…

Сөбүлүүр идэтин табатык талан, ол үлэтигэр туох баар өйүн, сүрэҕин, дууһатын иҥэрэн үлэлээн-хамсаан, бар дьон махталын толору ылбыта.

Антонова Ульяна Николаевна, М.А.Охлопкова аатынан Хатырык модельнай библиотекатын сэбиэдиссэйэ, СӨ култууратын туйгуна