Хатырыкская сельская модельная библиотека им. М.А.Охлопковой

Мин, Хатырыкка библиотекаҕа үлэлии кэлэн баран саамай сөхпүтүм бу библиотека биир истиэнэтэ барыта араас ааттаах паапкаларынан тобус толору истиэнэ этэ.

Сыыйа-баайа бу манна туох баарын хасыһар киһи буолтум. Уонна араас хайысхалаах паапкалары мунньар да оҥорор да буолар эбиттэр диэн соһуйа да, астына да көрөн үлэбэр туһанан киирэн барбытым.  Аны туран, Хатырык нэһилиэгин историятын кэпсиир фотоальбомнар 1958 сылтан ыла оҥоһуллубуттар. Манна Хатырык оскуолата, балыыһата, детсада, колхуоһа, сопхуоһа, музыкальнай оскуолата онтон да атын тэрилтэлэр тустарынан кэпсиир фотоальбом арааһа сөхтөрбүтэ.  Мантан сиэттэрэн, балыыһа уонна музыкальнай оскуола кинигэлэрэ тахсалларыгар бу хаартыскалаах, ыстатыйалаах альбомнар көмө, тирэх буолтара.

Билигин да быыстапкалары оҥорорбор бу истиэнэ паапкаларын хасыһан тугу барытын булабын. Бу Мария Алексеевна үлэлиирин саҕаттан, кини кэнниттэн үлэлээбит Евгения Афанасьевна Дьяконова оҥорон-тутан кэбиспит, хомуйбут паапкалара буолаллар. Өссө маны таһынан Евгения суруйбут сценарийдара, оҕолорго анаан оҥорбут рекомендательнай списоктара бааллар. Мин кини бэйэтин илиитинэн тутан оҥорон, уруһуйдаан хаалларбыт баай матырыйаалларын үгүстүк үлэбэр туттабын уонна олус махтанабын.

• Туох суоҕуй бу манна? – диэхпин баҕарабын өссө.

Биир саамай соһуйбут альбомум урукка артыыстар хаартыскаларынан оҥоһуллубут фотоальбом. Манна, били оҕо сырыттахпына, эдьиийдэрим “туттарбат”, кыраһыабай бэйэлээх артыыстарын хаартыскалара килиэйдэммиттэр: Ариадна Шенгелая , Анастасия Вертинская, Людмила Гурченко, Иннокентий Смоктуновскай, Людмила Чурсина уо д.а.  элбэхтиир элбэхтэр… , эчи кыраһыабайдарыын…

1965 сыллаахха Кыайыы 20 сылыгар анаан оҥоһуллубут альбомтан, абаҕам гвардия ефрейтора, уоттаах сэрии ортотугар «Аҕа дойду Улуу сэриитин», «Албан Аат» орденнарынан наҕараадаламмыт Володя Павлов туһунан ыстатыйаны булан аймахтарбын, дойдум дьонун үөрдүбүтүм. 

Аны 1961 сыллаахха оҕолорго анаан П.Бажов Уральские сказки Бажова өҥнөөх аккырыыккаларынан, бэйэтэ уруһуйдаан оҥорбут альбома оҕо сааспын хайаан санатыахтара суоҕай?

Маны таһынан таайа Максим Кирович Аммосовка аналлаах  альбомнар араас темаларынан хомуллан оҥоһуллубуттар.

Кини маны барытын бэйэтин эрэ үлэтигэр буолбакка республика араас библиотекаларыгар оҥорон ыытан бэлэх уунар эбит.

Үүнэр көлүөнэ ыччат, араас идэлээх үлэһиттэр да махтаныах эрэ тустаахпыт Хатырыкка маннык дьиҥ чахчы үлэлэригэр бэриниилээх дьон үлэлээн ааспыттарыттан.

Любовь Ивановна Васильева, М.А.Охлопкова аатынан модельнай библиотека үлэһитэ,

СӨ култууратын үтүөлээх үлэһитэ