Хатырыкская сельская модельная библиотека им. М.А.Охлопковой

Бүгүн сарсыардаттан ардахтаах буолан эбиэттэн киэһэ 14.00 чаастан Хатырыкпыт пааркатыгар баран ыһыах ыһар сирбитин көрдүбүт, билистибит. Сорох оҕолор пааркаҕа саҥа сылдьаллар эбит.

Саха халандаарыгар бүгүн бэс ыйын 10 күнэ — Сөдүөччүйэ аатынан күн. Дьахтар күүлэйдиир күнэ. Сайылыкка көһүү сүпсүлгэнэ бүтэн, нус-хас үүт тураан күннэр үүнэллэр. Уоскуйбучча, дьахталлар оҕолорун батыһыннара сылдьан, кырдьаҕас хатыҥ маска салама ыйыыллар, алаадьы буһаран сыт таһаараллар. Бу күн чуумпу буоллаҕына, үрдүк үүнүүнү кэтэс, – дииллэр эбит.

Сиэри тутуһан бүгүн биһиги пааркабыт аттыгар турар кырдьаҕас Аар Хатыҥмытыгар салама ыйаатыбыт, арыылаах алаадьынан күндүлээтибит. Оҕолорбутугар пааркаҕа баар сэргэлэр, ураһалар, аар баҕахтар суолталарын быһааран кэпсээтибит. Аҕа Дойду Улуу сэриитигэр аналлаах пааматынньык историятын Надежда Ивановна кэпсээтэ.

Биолог кыыспыт Лена Антонова пааркаҕа үүнэр мастары, үүнээйилэри, туохха туһалаахтарын кэпсээтэ.

Уонна саамай кэрэхсэллээҕэ диэн орто паарка сыанатын кэннигэр баар аллеяны ыраастаатыбыт.  

Түмүкпүтүгэр Охлопковтар аймах түмсэн аһыыр түһүлгэлэригэр киирэн астына минньигэспитин, алаадьыбытын сиэтибит уонна курулас ардах ортотунан дьиэлээтибит.

Бүгүҥҥү күммүт итинник түмүктэннэ.