Хатырыкская сельская модельная библиотека им. М.А.Охлопковой

Эрдэ кэпсээбиппит курдук Мария Алексеевна нэһилиэккэ туох буола турарын хаартыскаҕа хатаабыта үйэлэргэ саҥата суох оччотооҕу олох кэрэһитэ  буолан хааллаҕа…

Ааспыт үйэ 50-с сылларыгар дойду үрдүнэн ОСКУОЛА-ПРОИЗВОДСТВО-ҮРДҮК ҮӨРЭХ диэн бачыым олоххо киирбитэ. Бу сэрии кэнниттэн дойдуну сайыннарыы, чөлүгэр түһэрии, колхозтаахтар олохторун тупсарыы кэмэ этэ. Ханна да буоларын курдук үлэһит илии тиийбэт кыһалҕатыттан олохтоммут буолуохтаах.  

Хатырык орто оскуолатын 1957 уонна 1958 сыллаахха бүтэрбит оҕолор колхуоска үлэлии хаалбыттар эбит.

Оччолорго оскуолабыт 10 кылаастааҕа. Фотоальбомҥа көстөрүнэн аан бастакынан путевка ылан үлэлии барбыттар: Наумова Анна Константиновна, Ощепкова Сарра, Слепцова Розалия, Семенова Варвара, Попова Матрена бааллар. Кинилэртэн сорохторо 1 сыл сорохторо 2-лии сыл колхуоска үлэлээбиттэр. 1958 сыллаахха Зина Охлопкова, Ульяна Семенова, Мария Обутова, Клара Попова, Данил Пахомов, Анастасия Прокопьева бааллар. Бу оҕолор олоххо активнай позициялаах буолан нэһиилэккэ ыытыллар бары үлэҕэ активнайдык кытталлар эбит. Ол курдук альбомҥа Данил Пахомов матросскай үҥкүүгэ кытта сылдьара, Матрена Попова спектакльга түспүт хаартыскалара кичэллээхтик килиэйдэммиттэр. Бары да уус-уран самодеятельность активнай кыттааччылара, библиотека бастыҥ ааҕааччылара буолан туох да үлэттэн туора турбаттара көстөр. Манных хаартыскалардаах альбому биһиги библиотекабытыгар көрүөххүтүн сөп.

Любовь Ивановна Васильева, М.А.Охлопкова аатынан модельнай библиотека үлэһитэ, СӨ култууратын үтүөлээх үлэһитэ