Хатырыкская сельская модельная библиотека им. М.А.Охлопковой

Хатырык библиотекатын  үлэтэ ааспыт үйэ 50-с сылларыттан биллэ тупсан барбыта. Иван Иннокентьевич Попов да, Мария Алексеевна да хайа күн үлэлии киириэхтэриттэн библиотека фондатын байытыыга, олохтоох специалистар ханнык кинигэҕэ наадыйалларын учуоттаан библиографическай ыйынньыктары оҥортоон тута дьон-сэргэ сэҥээриитин ылбытынан барбыта. Мария Алексеевна оҕолорго анаан анал кинигэ угар дьааһыктары бэйэтин илиитинэн-тутан-хабан оҥортообута. Оройуоҥҥа, куоракка киирдэҕинэ наар кинигэ атыылаһан, уларсан таһаарара. Саха сиригэр олорор, үлэлиир элбэх ахсааннаах ааҕааччылары кытта суругунан сибээстэһэрэ. Кинилэргэ көмө, сүбэ биэрэрэ. Махталлаах ааҕааччылар араас улуустартан кинигэ бэлэх ыытан үөрдэллэрэ.

Библиотекаҕа ааҕааччылар ирдэбиллэрин толорор тэтэрээт оҥоһуллубута. Бу манан сирдэтэн кинигэни булуу-талыы, атастаһыы үлэтэ киэҥник барбыта.

Маны таһынан Мария Алексеевна олоххо активнай көрүүлээх буолан, нэһилиэк ыытар бары тэрээһинигэр активнай кыттааччы, сүрүннээччи этэ.

Бастакы улахан наҕараада биһиги библиотекабытыгар Мария Алексеевна үлэлээбитэ  биир сылыгар туттарыллыбыта. Ол Саха АССР култууратын министерствотын БОЧУОТУНАЙ ГРАМОТАТА  1956 сылга культурнай-сырдатар үлэни үчүгэйдик түмүктээбитин иһин этэ.

Иккис улахан наҕараада РСФСР култууратын министерствота  туттарбыт БОЧУОТУНАЙ ГРАМОТАТА буолар. Бу Грамота 1958 сыллаахха Бүтүн Россиятааҕы культурнай-сырдатар тэрилтэлэр икки ардыларыгар көрүү- күрэххэ активнай кыттыытын иһин бэриллибит.

Ити кэмтэн ыла Хатырык бибилиотеката саха сиригэр аата киэҥник ааттаммыта.

Любовь Ивановна Васильева, М.А.Охлопкова аатынан модельнай библиотека үлэһитэ,