Хатырыкская сельская модельная библиотека им. М.А.Охлопковой

Хатырык библиотеката Өрөспүүбүлүкэтээҕи култуурунай-сырдатар училище библиотечнай отделениетын студеннарыгар базовай библиотека буолан 1958 сылтан 1974 сылга диэри олус үчүгэйдик үлэлээбитэ. Элбэх киһи биһирэбилин, сэҥээриитин ылбыта.

Үөрэппит оҕолоро үлэлии өрөспүүбүлүкэ араас муннуктарыгар тарҕаһаллара уонна учууталларыттан сүбэ-соргу көрдөөн мэлдьи суруйа тураллара, сибээстэрин быспатахтара. Сайынын куоракка кэллэхтэринэ Хатырыктарын тумнубаттар этэ. Мэлдьи кэлэн, ыйыталаһан, сүбэлэтэн, туох эмит илии тутуурдаах бараллара. Кэлэр сылга туох тэрээһини ыыталларын былаанын торумнаан бараллара. Кэһиилэрин кинигэ аҕалаллара уонна бэйэлэрэ эмиэ кинигэ кыбыныылаах төннөллөрө. 

Мария Алексеевна А.С.Пушкин аатынан библиотека штаты таһынан методиһа буолан элбэх улуустарга сылдьан бэйэтин опытын, кэпсиир, тарҕатар этэ. Хатырыкка практика барбыт оҕолорун көрүстэҕинэ үөрэн мичилийэрэ, үчүгэйдик үлэлии сылдьалларыттан астынара, хайаан да нэһилиэктэрин салайааччытыгар киирэн санаатын этэрэ-тыынара.

Хатырык библиотеката ол кэмнэргэ бэйэтэ бас билэр дьиэтэ-уота да суох буоллар, үрдүк таһаарыылаахтык үлэлээбитин ити да түгэннэр туоһулууллар.

Барыта 58 студент практикаларын ааспыттара. Кинилэртэн үгүстэрэ өр кэмнэргэ араас салайар үлэҕэ үлэлээбиттэрэ. Бэйэлэрин оройуоннарын доргуччу ааттаппыттара.

Любовь Ивановна Васильева, М.А.Охлопкова аатынан модельнай библиотека үлэһитэ, СӨ култууратын үтүөлээх үлэһитэ