УЛУУ КЫАЙЫЫ СУОЛУНАН

22.02.2025
388
нет

Новости

Олунньу 21 күнүгэр Хатырык нэһилиэгин М.А.Охлопкова аатынан библиотека уонна “Сайдам” норуот айымньытын Дьиэтэ Россияҕа Аҕа дойдуну, Саха сиригэр Ийэ дойдуну көмүскээччилэр, Нам улууһугар “Кыайыы”, биһиги нэһилиэкпитигэр “Ытыктабыл” Сылларыгар аналлаах түөлбэлэр икки ардыларыгар “Кыайыы 80 ыйытыга” диэн интеллектуальнай оонньуунан бастакы тэрээһиммитин ыыттыбыт.

Тэрээһини нэһилиэкпит баһылыга Артур Егорович Ноговицын эҕэрдэтинэн арыйда. Манна кини түөлбэлэр икки ардыларыгар оҥоһуллубут 2025 сыллааҕы үлэ бастакы тэрээһинэ буоларын уонна бары кыттааччыларга махталын уонна ситиһиини баҕарарын эттэ. М.А.Охлопкова аатынан библиотека сэбиэдиссэйэ, СӨ култууратын туйгуна Антонова Ульяна Николаевна Аҕа дойду улуу сэриитин туһунан кинигэлэри билиһиннэрэн ырытыы оҥордо.

Оонньууга 5 түөлбэ 4-түү киһилээх хамаанда туруоран сытыы оонньуу буолла. Ол курдук: “Сайдыы” түөлбэ салайааччы – Жиркова Надежда Романовна, “Чэбдик ыал” – салайааччы Иванова Татьяна Васильевна, “Чаанньыктаах уонна Байдам” түөлбэ – салайааччы Дьяконова Валентина Семеновна, “Сомоҕо” – салайааччы Ефремова Елена Владимировна, “Ситим” салайааччы – Кириллина Ольга Ивановна.

Оонньуубутугар үксэ эр дьон кыттыбыттара махталлаах. Бүтэһиккэ икки тэҥнэспит “Сайдыы” уонна “Ситим” хамаандаҕа 10 –нуу “түргэн боппуруостар” бэриллэн Василий Собакин, Валерий Шелковников, Николай Попов кыттааччылардаах “Сайдыы” хамаанда бастаан таҕыста. Түөлбэлэр күрэхтэрин тэтимин ыһыктыбакка иннибит хоту эрэллээхтик хардыылаан иһэбит.

Кыттааччыларга махтал сурук, кыайыылаахтарга “Добун сурук” туттардыбыт. Илья Винокуровпыт “Хайыһарын” ыллаан дуораттыбыт.

Бука бары кыттыбыт дьоммутугар барҕа махталбытын тиэрдэбит!