Хатырыкская сельская модельная библиотека им. М.А.Охлопковой

Ыам ыйын 1 күнүгэр Хатырык нэһилиэгэр “Оонньооботох оҕо саас”  кинигэ сүрэхтэннэ. Кинигэ сэрии кэмин оҕолоругар ананна. Барыта 80 ахтыы, 80 хаартыска киирдэ. Кинигэни М.А.Охлопкова аатынан олохтоох, модельнай библиотека оҥорон нэһилиэккэ улахан бэлэх оҥордулар.

Сүрэхтэнии кэмигэр 200 –тэн тахса, Саха Республикатын култууратын үтүөлээх үлэһитэ Мария Алексеевна Охлопкова мунньубут, түһэрбит хаартыскаларынан бэртээхэй презентация көрдөрбүттэрэ киэҥ биһирэбили ылла.

Кинигэ сүрэхтэниитигэр кыттыыны нэһилиэк дьаһалтатын сүрүннүүр үлэһитэ Татьяна Арыяновна Местникова, улуустааҕы кииннэммит библиотекаттан салайааччы Александра Валентиновна Никонова, методотдел сэбиэдиссэйэ Наталья Васильевна Павлова кыттыыны ыллылар, “Сайдам” культура Киинин директора Ефремова Елена Владимировна, бэтэрээннэр Сэбиэттэрин бэрэссэдээтэлэ Светлана Васильевна Дьяконова махтал тылларын эттилэр.    

Сэрии кэмин оҕолоро Данил Данилович Пахомов, Мария Даниловна Собакина(Обутова) оонньооботох оҕо саастарын, сэрии ыар кэмнэригэр олохторун туһунан кэпсээтилэр. Хатырык орто оскуолатын үөрэнээччилэрэ Эрхаан Константинов, Анюта Гуляева, Альфред Марков хос эбээлэрин туһунан кэпсээтилэр.

Улахан махталбытын нэһилиэкпит олохтооҕор, бу истиҥ көрсүһүүнү устан үйэтиппит  Николай Васильевич Поротовка тиэрдэбит!

Махтанабыт,
Сут — кураан нүһэр тыынын
Аҕаны сүтэрии аһыытын,
Аччык аҥаардаах кэмин
Оонньооботох оҕо сааһын,
Дьылҕа хаан охсуутун уйан
Дьарамай санныгар сүгэн
Эйэлээх олоҕу уһансыбыт
Ийэбитигэр, эдьиийбитигэр.

Ахтабыт — саныыбыт,
Кыаҕын таһынан үлэлээн
Кыа хаанынан туруулаһан
Кылгаабыт үйэлээх дьоммутун,
Хаһан да умнубаппыт
Кыайыы өрөгөйдөөх күнүн
Харахтара ууланан көрсөр
Хоһуун — аҕам саастаах,

Хорсун хоодуот аҕаларбытын эһээлэрбитин!