Хатырыкская сельская модельная библиотека им. М.А.Охлопковой

Дойду Бэрэсидьиэнэ В. Путин 2022 с. бэс ыйын 28 күнүнээҕи Ыйааҕынан от ыйын 8 күнүн Дьиэ кэргэн, Таптал уонна Бэриниилээх буолуу күнүнэн биллэрбитэ.

О дне семьи, любви и верности. Указ президента РФ https://www.prlib.ru/item/1792455

Хатырык нэһилиэгин олохтоохторун барыгытын бырааһынньыгынан эҕэрдэлиибит! Дьиэ кэргэн диэн киһиэхэ туохтааҕар да күндү. Оттон дьиэ кэргэн бигэ тирэҕэ – таптал уонна бэриниилээх буолуу. Дьоллоох буолар туһугар бу иэйиилэргитин харыстааҥ. Эһиэхэ чэгиэн-чэбдик доруобуйаны, дьиэ кэргэҥҥитигэр дьолу-соргуну, өйдөһүүнү, этэҥҥэ буолууну уонна туруоруммут сыалгыт туоларыгар баҕарабыт! Алаһа дьиэҕит куруутун сылааһынан угуттаатын, тапталынан, оҕо күлүүтүнэн туоллун. Оҕолоргут, сиэннэргит саҕалаабыт дьыалаҕытын салҕаан, саҥа кыайыыларынан үөрдэ турдуннар!

Нэһилиэкпит историятын үйэтитээччи Николай Поротов

Николай Васильевич аҕыс оҕолоох Анна Николаевна уонна Василий Васильевич Поротовтар улахан дьиэ кэргэннэригэр  балаҕан ыйын 24 күнүгэр 1968 сыллаахха Хатырык нэһилиэгэр төрөөбүтэ. Хатырык орто оскуолатын үөрэнэн бүтэрбитэ. Орто анал үөрэхтээх. Өр сылларга төрөөбүт нэһилиэгэр  киномеханигынан үлэлээбитэ. Ол үлэтэ сыаналанан Саха Өрөспүүбүлүкэтин  кинематографиятын туйгуна буолбута.

90—с сыллартан олохпут тутула  уларыйан, өрөспүүбүлүкэбит балысханнык сайдан барбыта. Түһүү, тахсыы, уларыта тутуу, ыһыллыы-тоҕуллуу барыта баара…

Ол кэмнэргэ демократия,  интернет, телевидение аһаҕас буолбута. Улуустарга араас таһымнаах телестудиялар, радиолар үлэлээн барбыттара. Хатырык нэһилиэгэ да, онтон туора турбатаҕа.

1993 сыллаахха энтузиаст Николай Поротов оччотооҕу сельсовет председателэ Егор Павлович Рехлясов көҕүлээһининэн нэһилиэгин историятын, олоҕун-дьаһаҕын устуунан дьарыктанан барбыта. Телевидение передатчигын космофизика институтун үлэһитэ Валерий Губанов аҕалан туруоран биэрбитэ.

Хатырык телестудията арылларыгар кини оскуолаҕа куруһуок салайааччытынан үлэлиирэ. Студия директора, эдьиийэ Светлана Васильевналыын, күнүстэри-түүннэри үлэлииллэрэ. Бэйэлэрэ усталлара, редакциялаан монтажтыыллара, диктордыыллара уонна дьэ дьон-сэргэ көрүүтүгэр таһаараллара.  Бу элбэх үлэни, сыраны эрэйэр үлэ этэ.  Ол курдук кинилэр устубут матырыйааллара, нэһилиэк олохтоохторун ахтыылара, ол кэмнэргэ буолан ааспыт улахан да, кыра да тэрээһиннэр билигин биһиги нэһилиэкпит историята буолла.

Николай Васильевич 700-тэн тахса устубут видеокассеталаах. Бу кассеталарын аныгы технологиянан көһөрөн, интернет ситимигэр, бэйэтэ ханаал арыйан дьон-сэргэ көрүүтүгэр таһаарар.  Кини устубут киинэлэрин бэйэтин ханаалыгар бу сигэнэн киирэн https://rutube.ru/channel/25274842/  көрүөххэ сөп.

Бүгүн биһиги эһиги болҕомтотугар нэһилиэкпит олохтооҕо, нэһилиэк олоҕун киинэҕэ устан үйэтитээччи  Николай Васильевич Поротов архивыттан Дьиэ кэргэҥҥэ анаан ыытыллыбыт тэрээһиннэри устубутун таһаарабыт. Үйэлээх киинэлэри көрүҥ, сэргээҥ!

Чөл туруктаах дьиэ кэргэн. Биһиги нэһилиэкпит оскуолатыгар химия учууталынан үлэлээбит,  пенсияҕа тахсан баран нэһилиэк түөлбэлэрин салайбыт Дарья Григорьевна Ядрихинская, чөл олохтоох ыал Романовтар аҕаларыттан ылбыт интервьютун көрүөххүт. Киинэ 2012 сыллаахха уһуллубут. Оператор Н.В.Поротов

https://vkvideo.ru/video-230050168_456239045?t=4m29s

Ийэм аҕам уонна мин. Бу киинэҕэ  “Кэрэчээнэ” оҕо уһуйааныгар ыытыллыбыт эдэр ыаллар, Татариновтар, Лазаревтар уонна Модут нэһилиэгиттэн кыттыбыт дьиэ кэргэн күрэҕин көрүөххүт.

Киинэ кулун тутар ый 31 күнүгэр 1998 сыллаахха уһуллубут. Оператор Н.В.Поротов

https://rutube.ru/video/a4c2df9533e17a235479c3fb49db4186/

Эдэр саас таптал дьол күрэҕэ. Бу киинэҕэ улуус нэһилиэктэрин эдэр ыалларын күрэҕин көрүөххүт. Ыччат сылыгар аналлаах күрэҕи улуус дьаһалтатын Дьиэ кэргэн отдела, ыччат союһа, улуустааҕы дьахтар кэмитиэтэ тэрийэн ыыппыттар.  Манна Нам бөһүөлэгиттэн, Модуттан, Аппааныттан Партизан, Хатырык нэһилиэгиттэн эдэр ыаллар кыттыыны ылбыттар. Биһиги нэһилиэктэн оччолорго оскуола директорынан үлэлээбит Мария Семеновна, Николай Васильевич Игнатьевтар, Марта Васильевна, Афанасий Иннокентьевич Татариновтар ситиһиилээхтик кыттыбыттар.  Киинэ ыам ыйын 17 күнүгэр 1996 сыллаахха уһуллубут. Оператор Н.В.Поротов.

https://rutube.ru/video/dd691814dd6efe611ed7d319f63bb197/

Дьиэ кэргэнинэн  ырыа күрэҕэ. Бу күрэх 2012 с. Саҥа Дьыллааҕы тэрээһиҥҥэ ыытыллыбыт. Бу күрэххэ Чукровтар, Татариновтар, Константиновтар уонна Парниковтар кыттыыны ылбыттар. Киинэ 2012 сыллаахха уһуллубут. Оператор Н.В.Поротов

https://rutube.ru/video/0fec9db662290fcfe8e6115e7f140f8c/