Хатырыкская сельская модельная библиотека им. М.А.Охлопковой

Биһиги нэһилиэкпитигэр төрөөбүт төрүт тыл уонна сурук- бичик нэдиэлэтэ саҕаланан библиотекаҕа, оскуолабытыгар, бэл кырачаан оҕолорбутугар  араас хабааннаах тэрээһиннэр ыытылла тураллар.

Библиотекаҕа “Ийэ тылбыт этигэн кэрэтэ” кинигэ быыстапката туруордубут.

Саамай кэрэ, саамай күндү,

Умнуллубат, уостан түспэт,

Ийэ тэҥэ нарын-намчы,

Мунчаардахха, мунаардахха,

Ырыа буолан саататар,

Саамай уустук санаалары

Сатаан этэр кыаҕы биэрэр,

Олунньу 11 күнүгэр төрүт  тылбытыгар аналлаах Максим Аммосов аатынан Хатырык орто оскуолатын улахан кылааһын оҕолоругар анаан үгэс буолбут, сылын аайы ыытыллар  «Толкуйдаа, оонньоо кыай» оонньуубутун оонньоттубут. Быйыл арыыйда уларыттыбыт. Кылаастар тус-туһунан киирэн иккилии хамаандаҕа арахсан оонньоотулар. Ооньуу олус тыҥааһыннаахтык, интэриэһинэйдик барда. Хамаандалар аат толкуйданан, бэйэлэрин билиһиннэрэн, өбүгэ кэрдиистээх хабылыгынан күрэхтэһэн, сахалыы тыллары быһааран, аныгылыы интерактивнай оонньууга билиилэрин тургутан оонньоон, сандал саас туһунан тэттик кэпсээн, хоһоон айан күрэхтэстилэр. Уолаттар саас тиэмэтигэр булт, кыргыттар таптал, доҕордоһуу, ырыа туһунан бэртээхэйдик айан кээстилэр.

Холобур:

1. Тымныы кыһынтан арахсан

Халлааммыт сылыйбыт

Оҕо –аймах таһырдьаттан арахпат

Сандал сааһы көрсөр.

2. Мин санаабар саас кус-хаас кэлэр кэмэ. Халлааммыт сылыйар эрээри, сөрүүн салгын сайа охсор. Оҕолор таһырдьа оонньуур кэмнэрэ саҕаланар. Кэрии тыаҕа, кэҕэбит барахсан саҥа ырыаларынан үөрдэр.
3. Сайа охсор тыаллаах күҥҥэ,

Оҕо, эдэр сааспар,

Алааспар киирэммин

Сылаас үүтээммэр

Үтэбин сылыттан.

Уоппун, сирбин аһатан

Этэҥҥэ сааскы

Булка тиийдим.

4. Сааскы сайа охсор тыалтан

Киһи-аймах санаата үөрэр

Оҕо-аймах көрүлүүр

Кэҕэ этэн чоргуйар,

Халлааммыт сылыйар…

5. Сайа охсор тыал

Санаабын үөрдэр

Иэйиим киирэн

Ырыабын ыллыыбын.

Кутум-сүрүм оонньуур,

Кэҕэ этэн чоргуйар,

Эдэр сааһым долгуйар

Халлааным сырдаан,

Күнүм сарыалланна

Үлэм саҕаланна.

Ити курдук 5 мүнүүтэ иһигэр оҕолорбут барахсаттар бэриллибит тыллары туһанан айа охсон кэбистилэр.  

Кыайыылаахтарбытын, кыттааччыларбытын минньигэс бирииһинэн күндүлээн үөрүүлэрэ өссө үрдээн, үөрэн-көтөн тарҕастыбыт.   

Ийэ тылбыт сүппэтин туһугар — БАРЫ БИИРГЭ!!!