Хатырыкская сельская модельная библиотека им. М.А.Охлопковой

Бибилитиэкэбитигэр Олоҥхо декадата сэтинньи 25 күнүттэн саҕаланна. Аан бастакы тэрээһиммит үгэскэ кубулуйбут Олоҥхо Дьыктаанынан саҕаланна. Манна барыта 13 киһи кыттыыны ылла. Дьыктааны Саха Өрөспүүбүлүкэтин үөрэҕириитин туйгуна, М.К.Аммосов аатынан Хатырык орто оскуолатын саха тылыгар уонна литературатыгар учуутала, библиотекабыт истиҥ доҕоро Екатерина Спартаковна Петрова аахта. Кыттыбыт дьонтон 5 кыттааччы туйгун сыананы ыллылар: «Бастыҥтан бастыҥ суруксут» аатын КСМФЦ үлэһитэ Татьяна Васильевна Иванова ылыан ылла. Татьяна Васильевна кыраһыабай, ыраас буочарынан, биир да сыыһата суох суруйбут. Диктаммыт быйылгы тиэмэтэ: И.И.Бурнашев-Тоҥ Суорун «Сылгы уола Дыырай Бухатыыр» олоҥхоттон быһа тардыы.

Сэтинньи 26 күнүгэр оскуола оҕолоругар 5-с, 7-с, 9-с кылаас оҕолоругар «Олоҥхо киэҥ киэлитин сэгэтэн» диэн ис хоһоонноох литературнай чаастары ыыттыбыт. Манна «Мин дойдум-олоҥхо дойдута» бэсиэдэ кэпсээтибит. Биир дойдулаахпыт В.Н.Попов олоҥхотуттан быһа тардан оҕолор аахтылар, олоҥхо ырыаларын толорууга холонон көрдүбүт. Викторина боппуруостарыгар эппиэттээтилэр. Олоҥхо ырыатын толорууга Хатырыктааҕы музыкальнай оскуола фольклор кылааһын уһуйааччыта Марина Афанасьева уонна библиотекарь Любовь Васильева маастар кылаас ыыттылар, библиотека сэбиэдиссэйэ Ульяна Антонова алаадьынан күндүлээтэ.

Бу тэрээһиммитигэр олоҥхо викторинатыгар сөптөөх хоруйдары толору эппиэттээн, олоҥхоттон Сорук Боллур ырыатын итэҕэтиилээхтик толорон 9-с кылаас үөрэнээччитэ Артем Кириллов «Дьулуруйар Ньругун Боотур» олоҥхо кинигэтинэн биһирэннэ.

Бу сигэлэри баттаан “Олоҥхо дойдута – Хатырык” диэн урукку кэмҥэ ыытыллыбыт тэрээһиннэри билсиэххин сөп.

https://khatyryk.namlib.ru/yolen-kyyrdyt-bochooh-olonhoto/

https://khatyryk.namlib.ru/hatyryk-olonho-dojduta/

https://khatyryk.namlib.ru/olonho-saha-noruotun-ojyn-sanaatyn-tylyn-ohyn-kylaan-chypchaala/