Хатырыкская сельская модельная библиотека им. М.А.Охлопковой

Уус-уран тыл ураты маастара, бэйиэт  Ю.В.Потапов-Саргын 85 сааһын бэлиэтээн  кини хоһооннорун уус-ураннык ааҕыыга улуустааҕы күрэх Хатырыктааҕы “Сайдам” норуот айымньытын дьиэтэ көҕүлээн, «Хатырык нэһилиэгэ» тыа сирин түөлбэтин дьаһалтата, Н.М.Рыкунов аатынан Намнааҕы кииннэммит библиотека, М.А.Охлопкова аатынан модельнай библиотека тэрийиилэринэн алтыс төгүлүн ыытылынна.

Юрий Васильевич 1941 сыллаахха ахсынньы 30 күнүгэр Нам улууһун Арбын нэһилиэгин Кириэстээх диэн сиргэ төрөөбүтэ. Арбын начальнай, Хатырык аҕыс кылаастаах оскуолатын 7 кылааһын бүтэрэн баран, Хамаҕатта аҕыс кылаастаах оскуолатын бүтэрээт, Бүлүүтээҕи педучилищеҕа үөрэнэ киирбитэ. Ити кэмнэргэ Хатырыкка, Хамаҕаттаҕа литературнай куруһуокка сылдьан төрөөбүт тыл абылаҥар, кистэлэҥэр уһуйуллубута. Оҕо эрдэҕиттэн хоһоон суруйар дьарыгын олоҕун устата илдьэ кэлэн, сайыннаран, билигин 400 тахса хоһоон, 11 кинигэ ааптара. Юрий Васильевич хомоҕой тыллаах хоһоонноругар улуус мелодистара мелодия айан  ырыа буолан дайаллар.

Биһиги библиотекабыт “Мин ырыа буоламмын хаалыаҕым…” диэн ааттаах төгүрүк остуолу иилээн-саҕалаан ыыттыбыт. Манна кыттыыны  Саха Өрөспүүбүлүкэтин суруйааччыларын Сойууһун чилиэнэ,  Нам улууһун “Отуу уота” литературнай түмсүү салайааччыта, “Туллук хаара” мелодистар, “Алгыс” олоҥхоһуттар түмсүүлэрин чилиэнэ, РФ норуотун үөрэҕириитин туйгуна, “Саха-Азия оҕолоро” пуонда стипендиата, «Үөрэнээччилэр билиниилэрэ» аат туһааннааҕа, педагогическай үлэ бэтэрээнэ Татаринов Алексей Михайлович-Удьурҕай, “Нам улууһа” муниципальнай оройуон культураҕа уонна духуобунай сайдыыга управлениетын специалиһа Винокурова Ирина Семеновна, Николай Рыкунов аатынан Нам улууһун кииннэммит библиотечнай система информационнай уонна методическай отделын методиһа Зырянова Татьяна Афанасьевна, Саргын кыргыттара, улуустааҕы “Отуу уота”   суруйааччылар түмсүүлэрин чилиэннэрэ, ааҕааччылар кыттыыны ыллылар.

Кыттааччылар, кыргыттара киһи иһиттэр-истэ олоруон курдук Саргын олоҕун, үлэтин, дьиэ кэргэнин туһунан уратытык ахтан-санаан аастылар. Биһиги Хатырыкпыт библиотекатын биир бастыҥ ааҕааччыта буоларын, куруук хоһоон аргыстаах, күлэн-үөрэн сэгэйэн киирэн кэлэрин Ульяна Николаевна кэпсээтэ, библиотека кыргыттарыгар Далбар Хотун Ылдьаанаҕа, киэҥ, холку Эпгиэнньэҕэ анаабыт хоһоонун иһиттибит, кулууп кыргыттарыгар анабыл хоһооннорун Культура дьиэтин кыргыттара аахтылар, кинини “Эһээбит кэллэ” диэн үөрэ-көтө көрсөн, ыаһахтаһалларын күн бүгүнүгэр дылы суохтуулларын долгуйа иһиттибит.

Төгүрүк остуол түмүгүнэн Саргын айар хонуутун үйэтитэр сыаллаах кинигэ тахсыытыгар күүс-көмө буоларга, Саргын хоһоонун ааҕыытын күрэхтэрэ сылын аайы ыытыллаллара буоллар оҕолорбут саха тылын билиилэригэр төһүү күүс буолуо этэ, улууска, төрөөбүт дойдутугар атын улуустар уопуттарын туһанан саҥа сүүрээн киирэрэ буоллар диэн баҕа санааларын тиэртилэр.

Уран тыл ураты маастара Юрий Васильевич Потапов айбыт, суруйан хаалларбыт хоһоонноро  үйэлэргэ хаалыа диэн кини тылларынан түмүктээтибит:

Мин ырыам-тойугум ылланыа,

Ыллыгым-аартыгым салҕаныа

Күн ахсын даҕаны буолбатар

Мэлдьитин сэмэйдик ахтыллыа…