Хатырыкская сельская модельная библиотека им. М.А.Охлопковой

Иннокентий Юрьевич 1962 сыллаахха Нам оройуонун Хатырык  нэһилиэгэр  төрөөбүтэ. Аҕата Юрий Петрович колхуостаах, ийэтэ Мария Степановна балыыһа үлэһитэ. Иннокентий ыал улахан уола этэ. Былыргыны сэргииригэр улахан сабыдыалы эбэтэ Харитина Кононовна Старостина оҥорбут буолуохтаах диэн сабаҕалыыллар. 1977 сыллаахха Нам музыкальнай оскуолатын художественнай кылааһын бүтэрбитэ. Хабаровскай куоракка култуура институтугар үөрэммитэ. Уссурийскай заповедникка егердии, Сахалиҥҥа балык собуотугар үлэлии сылдьыбыт кэмнэрдээх этэ. Биробиджаннааҕы драма тыйаатырыгар сценограбынан уонна режиссерунан үлэлээбитэ. Шолом Алейхем «Фрейлехс» уонна Исаак Бабель «Одесские истории» испэктээктэрин иһин Арассыыйа тыйаатырдарын бэстибээлин лауреата буолбута.
Дойдутугар төннөн кэлэн баран уруһуй учуутала, Хатырыкка култуура дьиэтин дириэктэрэ, Нам оройуоннааҕы култууратын салаатын мэтэдииһэ, Саха тыйаатырыгар бутафор буола сылдьыбыта.
«Эдэр саас», «Саха сирэ», «Киин куорат» хаһыаттарга худуоһунньук-иллюстратордаабыта. Саха сирин устуоруйатыгар анаан оҥорбут «Маһары Бозеков нуучча ыраахтааҕытыгар», «Лөгөй нуучча хаһаахтарын көрсүүтэ», «XX үйэ саҕаланыытынааҕы Дьокуускай. Троицкай собуор», «Эргэ куоратынан дьаарбайыы» сиэрийэтэ хрестоматия суолтатын ылбыттара. (Бикипиэдьийэттэн)