Хатырыкская сельская модельная библиотека им. М.А.Охлопковой

Билии биһигин Ытык Хотуна  Мария Алексеевна Охлопкова төрөөбүтэ 95, олохтоох бибилитиэкэ 80, ааҕар балаҕан төрүттэммитэ 95 сыллара.

Быйылгы бэлиэ үбүлүөйдээх сылбытыгар анаан олохтоох бибилитиэкэ былааннаахтык тэрээһиннэрбитин саҕалаатыбыт. Ол курдук төрөөбүт төрүт  тыл, сурук-бичик күннэригэр анаан тэрилтэлэр икки ардыларыгар 5 түһүмэхтээх “Т.О.К.: Толкуйдаа, Ооонньоо, Кыай” диэн үгэс буолбут оонньуубутуттан саҕалаабыппыт. Саха сирин үрдүнэн ыытыллар акцияларга кыттан оҕолорго “Таптыыр сахам тылынан” дьыктаан, улахан дьоҥҥо”Сахалыы дьыктаан” суруйтарбыппыт.

Онтон бэҕэһээ, олунньу 26 күнүгэр “Библиодесант-2026” диэн бырыайыакпыт чэрчитинэн Саха Өрөспүүбүлүкэтин Норуоттарын аудиовизуальнай нэһилиэстибэтин Киинин  11 киһилээх делегацията кэлэн, ыалдьыттаан бардылар. Тэрээһиммитигэр:  ыраастаныы, арчыланыы сиэрэ-туома, М.К.Аммосов аатынан Саха Өрөспүүбүлүкэтин Судаарыстыбаннас музейыгар экскурсия, минньигэс тотоойу эбиэт, олохтоох нэһилиэнньэни кытта  5 түһүмэхтээх “Т.О.К.: Толкуйдаа, Ооонньоо, Кыай.” оонньуубутугар күөн-күрэс буолан ааста. Күөн күрэскэ ыалдьыттар 3 хамаанданы, нэһилиэнньэттэн «Сайдам» норуот айымньытын Дьиэтин специалистара хамаанда туруоран 4 хамаанда кыттыыны ылла. Кыайыылаах ыалдьыттар хамаандалара минньигэс тордунан наҕараадаланна.

 Киин генеральнай дириэктэрин солбуйааччы Харлампьев Гаврил Игоревич уонна кылаабынай хранитель Пшенникова Анна Владимировна  нэһилиэк баһылыга Ноговицын Артур Егоровиһы уонна видеооператор Поротов Николай Васильевиһы кытта көрсөн киэҥ ис хоһоонноох кэпсэтии ыытылынна. Манна интэриэһиргиир боппуруостарыгар сөптөөх хоруйу ылан кэскиллээх үлэ саҕаланара торумнанна.   Манна даҕатан эттэххэ, Николай Васильевич биһиги нэһилиэкпит историятын видеоҕа устан үйэтитэ сылдьар ытык киһибит буолар. Кини видеотекатыгар ааспыт үйэ 90-с сылларыттан уһуллубут матырыйааллар харалла сыталлар.

Өссө биир интэриэһинэй туризм хайысхалаах туру «Сайдам» норуот айымньытын Киинин директора Елена Владимировна Ефремова билиһиннэрбитин ыалдьыттарбыт сэҥээрэн иһиттилэр, өссө кэлиэхпит диэн баҕа санааларын эттилэр.

Ыалдьыттарбыт библиотекаҕа анаан бэйэлэрин үлэлэрин фондаларыгар киирбит аннотациялаах каталогтарын 5-6-7 -с томнарын бэлэх ууннулар.