Хатырыкская сельская модельная библиотека им. М.А.Охлопковой

Хатырык олохтоох бибилиотеката быйылгы дьылга “Ааҕар балаҕан” тэриллибитэ 95 сылын, библиотекабытыгар өр сылларга үлэлээбит, нэһилиэк, улуус  Ытык Киһитэ, САССР култууратын үтүөлээх үлэһитэ, М. А. Охлопкова төрөөбүтэ 95 сааһын, сельскэй библиотека олохтоммута 80 сылын бэлиэтиибит. Онон быйылгы оонньуубут урут ыытыллыбыт оонньуулартан арыый атын буолла. Ол курдук нэһилиэк тэрилтэлэрэ 5 түһүмэҕинэн күрэхтэстилэр.  Тэрилтэлэр бары хамаандаларыгар аат толкуйданан, биир формаланан кэлбиттэрэ олус тэрээһиннээхтик бэлэмнэммиттэрин көрдөрдө. Ол курдук М.К.Аммосов аатынан элбэх хайысхалаах Культура Киинэ – “Сайдам”, балыыһа коллектива – “Чэгиэн”,  М.К.Аммосов аатынан орто оскуола – “Сахалар”, олохтоох дьаһалта – “Ньургуһуннар”,  детсад коллектива – “Кэрэчээнэ” диэн ааттанан кыттыыны ыллылар.

Оонньууну үс киһилээх дьүүллүүр сүбэ сыаналаата: ол курдук Саха Өрөспүүбүлүкэтин култууратын туйгуна, библиотека сэбиэдиссэйэ Антонова У.Н., Саха Өрөспүүбүлүкэтин үөрэҕириитин туйгуна Петрова Е.С., “Хатырык нэһилиэгин сайдыытыгар кылаатын иһин” бэлиэлээх Иванова Т.В.  

Оонньуубутугар “Саха тылын быһаарыылаах тылдьытын” туһанан үстүү сахалыы тылы таайтардыбыт. Хамаандалар син билэллэр эбит. Иккилии тылы таайдылар. Хабылыкка балыыһа “Чэгиэн” хамаанда оонньооччута Таисия Константинова уһулуччу үчүгэйдик оонньуурун  көрдөрдө. Интерактивнай боппуруостарбытыгар бары да бэркэ оонньоотулар. ҺӨҔҮҤ сахалыы дорҕооннорунан көҥүл тиэмэҕэ, талан ылбыт дорҕооннорунан остуоруйа айан, хоһоон, кэпсээн да суруйан холоммуттара сэҥээриини ылыан ылла.  

Дьэ сити курдук тапталлаах сахабыт тылын күнүн үөрүүлээхтик түмүктээтибит. Бары кыттааччыларбытыгар сэмэй бэлэхпитин туттардыбыт. ДОБУН КЫАЙЫЫЛААҔЫНАН М.К.Аммосов элбэх хайысхалаах Культура Киинэ – “Сайдам” хамаандата таҕыста. Бука бары бииргэ САХАБЫТ ТЫЛЫН САЙЫННАРА туруоҕуҥ!