Хатырыкская сельская модельная библиотека им. М.А.Охлопковой

Николай Николаевич Атласов аатынан Хатырыктааҕы музыкальнай оҕо искусство оскуолата 50 сыл анараа өттүгэр, 1975 сыллаахха Хатырык нэһилиэгэр Барылас учаастагар икки квартиралаах уопсай дьиэҕэ арыллыбыта. . Музыкальнай оскуоланы тэрийэргэ көҕүлээбит дьонунан буолаллар, ол саҕанааҕы Хатырык сэбиэтин бэрэссэдээтэлэ эһэм Татаринов Иннокентий Афанасьевич уонна  Хатырык орто оскуолатын дириэктэрин солбуйааччыта Матрена Николаевна Попова. Кинилэр оҕолорбут музыка эйгэтигэр сайдалларыгар, сыал-сорук туруораннар сөптөөх быһаарыныыны ылыммыттара. Бастакы дириэктэр соҕурууттан кэлбит Подхватилин Александр Александрович буолар. Биир сыл үлэлээбитин кэнниттэн, саҥа үөрэхтэрин бүтэрбит, Николай Николаевич Атласов кэргэнинээн Зинаида Никитичналыын үлэлии кэлбиттэрэ. Кинилэр уон сыл үлэлиир кэмнэригэр, хас даҕаны инструментальнай кылаастары арыйбыттара. Оҕолор, улахан дьон оркестрын, тыыннаах бөлөхтөрүн тэрийэн, Хатырык нэһилиэгин култууратын инники күөҥҥэ таһаарбыттара. Уопсайа 10 дириэктэр таһаарыылаахтык үлэлээн ааспыта. 2009 сыллаахха Николай Николаевич Атласов аата иҥэриллибитэ.   

   Мин кыра эрдэхпиттэн ырыа-тойук эйгэтигэр улааппытым. Ийэм, аҕам өттүттэн култуура эйгэлээх дьон буолаллар. Бэһис кылааска үөрэнэ сылдьаммын Хатырык музыкальнай оскуолатыгар 2005 сыллаахха Светлана Васильевна Дьяконоваҕа үөрэнэ киирбитим, 2007 сыллаахха бүтэрбитим. 2012 сыллаахха оскуоланы бүтэрэр сылбар ийэм Марта Васильевна көҕүлээһининэн, дьиэ кэргэмминэн, доҕотторбунаан “Музыка кэрэ дорҕоонун кэскилэ” диэн маҥнайгы айар киэһэбин тобус толору саалалаах Хатырык кулуубугар үрдүк таһымҥа тэрийбиппит. Ийэм сыанаҕа кэтэрбэр, кэнсиэр кыттааччыларыгар араас, элбэх көстүүмнэри тигэн, дьон-сэргэ биһирэбилин ылбыта.

    2016 сыллаахха Марк Николаевич Жирков аатынан Дьокуускайдааҕы музыкальнай колледжы бүтэрэн, дойдубар Николай Николаевич Атласов аатынан Хатырыктааҕы оҕо искусство оскуолатын директорынан ананан үлэбин саҕалаабытым. Кэтэхтэн 2022 сыллаахха Арктикатааҕы государственнай култуура уонна искусство институтун бүтэрбитим. Үлэлии кэлбит сылбар үөрэх министерствотыттан улахан бэрэбиэркэ кэлэр буолан, улахан үлэни көрсүбүппүт. Этэҥҥэ ааһаммыт, айар-тутар үлэбит күүстээхтик саҕаламмыта. Эбии фольклор, баян, флейта, скульптура, гитара кылаастара арыллыбыттара. Үлэм таһынан “Махсыым уолаттара” ырыа уонна “Дуолан” улахан дьон тыыннах бөлөхтөрүн тэрийбиппит. Быйыл “Чаҕылҕан” оҕо тыыннаах бөлөҕө сүрэхтэннэ.

  2021 сылтан З.П.Винокуров аатынан Намнааҕы оҕо искусство оскуолатыгар холбоһон филиал быһыытынан үлэлиибит.

2024 сыллаахха Максим Кирович Аммосов 125 үбүлүөйдээх сылыгар ананан тутуллубут, култуура уонна спорт элбэх хайысхалаах Киинигэр киирэммит үлэлиир усулуобуйабыт тубуста. Быйылгы үбүлүөйдээх сылбытыгар сэттэ уонтан тахса оҕо үөрэнэр. Араас элбэх тэрээһиннэргэ, конкурстарга куруук ситиһиилээхтик кытталлар. Сайыҥҥы бириэмэҕэ оҕо сайдар, сынньанар лааҕырын үлэлэппиппит.

 Бу 50 сыл иһигэр сүүһүнэн оҕо музыка уонна искусство эйгэтигэр уһуйуллан,   сайда улааттылар. Идэ оҥостубут выпускниктарбыт куруук махтал тылларын тиэрдэллэр.

 Хатырыкпыт, Наммыт улууһа уонна Өрөспүүбүлүкэбит култуурата, искусствота сайдарыгар, инники кэскиллээх буоларын туһугар бэриниилээхтик үлэлии туруохпут диэн эрэнэбин!

З.П.Винокуров аатынан Намнааҕы оҕо искусство оскуолатын

Н.Н.Атласов аатынан Хатырыктааҕы филиалын салайаачыта

Татаринов Иннокентий Афанасьевич

Бу сигэнэн киирэн урукку кэми ахтан-санаан ааһыҥ:  https://khatyryk.namlib.ru/wp-content/uploads/sites/13/2025/12/prezentacziya.pdf

 И. Алексеев, Саха АССР культуратын үтүөлээх үлэһитэ, филологическай наука кандидата. Саха оркестра. [конкурс түмүктэриттэн сиэттэрэн] // Кыым. – 1985. – кулун тутар 22 к. – с.3

… Хатырык орто оскуолатын оркестрын холобура хайа баҕарар тыа оскуолатыгар саха оркестрын тэрийиэххэ сөбүн көрдөрөр. Итиннэ музыкальнай үөрэхтээх буолууну таһынан, оскуола коллективын өттүттэн өйөбүл улаханан наада эбит. Холобур, ити оскуола завуһа Попова М.Н. бэйэтинэн киирсэн оҕолорун аһата-сиэтэ, сынньалаҥнарын тэрийэ сылдьара хайҕаллаах. Оҕолор булгуччулаах репертуары лоп-курдук толорууларыгар, эмиэ бүлүүлэр курдук, таҥсырга, кылыһахха, дүҥүргэ додо курдук оонньууллара көмөлөстө…

Бу конкурска Хатырык оҕолорун национальнай оркестра иккис бөлөххө бастаабыта. Истиҥ, сэргээҥ, Вася Винокуров толоруутугар «Эҕэрдэ ырыатын» ,Өлүөнэ эбэккэм ырыалары уонна оркестр толоруутугар музыкальнай айымньылары.